السلامعليكم ورحمة الله وبركاته

كيفكم صبايا ,اليوم حبيت أكتبلكم طريقتي الخاصة في تنزيل الوزن ,خاصة إني خبيرة من كتر ما نزلت وزني وفيكم تحكو إنو كنت بقرأ كتير عن هاي المواضيع وتابعت كتير برامج وتعلمت كتير شغلات ساعدتني, هلأ إحنا على أبواب الصيف وعنا كتير مناسبات ,وأنا صراحة رجع وزاد وزني كم كيلو ,وناوية أبلش اليوم ,قولو انشالله.

خلينا نبلش ,أول خطوة وأهم خطوة يلي لازم توخدوها بعين الإعتبار ,الإرادة والتصميم,وأنا راح أساعدكم وأعلمكم كيف توخدو متل هيك قرار ,يعني ببساطة لازم نقنع عقولنا بالموضوع ,كيف ؟مثلا بدي أبلش اليوم بحكي وبصوت عالي بدي أنزل وزني مثلا عشرة كيلو وبدي ألعب رياضة كل يوم ,هاي الجملة بكررها عشر مرات أو أكثر ,طبعا بتختلف من شخص لاخر ,ممكن توخد مع شخص يوم واحد ومع شخص تاني أكتر من يوم ,طبعا لا تستهينو بهادي الخطوة لإنو كل شي بيعتمد عليها ,ونصيحة لوجه الله يلي ما قدر وما إقتنع مزبوط لا يبلش ويغلب حاله لإنه بعدين بندم ,يعني خدو راحتكم بهالموضوع وبس تتأكدو إنكم قررتو وصممتو ساعتها بلشو.

الخطوة التانية ,وهاي خطوتي المفضلة ,جيبي ورقة كبيرة وقلام تلوين فلوماستر ,ومتر طبعا ,خدي كل قياسات جسمك بالضبط,وطبعا اخر شي خدي وزنك ,هلأبلشي أكتبي أول شي حطي الهدف ,يا ريت الهدف يكون شي بسيط شي يتقبله العقل يعني إنتي حابة تنزلي 25 كيلو مثلا ,لا تكتبي هدفي تنزيل 25 كيلو ,حطي الهدف تنزيل 4 كيلو بالشهر يعني كيلو في الأسبوع ,وهاد بكفي ,حتى إنتي ما تملي بسرعة وهاد بكون تحقيقه أسهل عليكي,ووزنك صحيح ما بنزل بسرعة يعني لازم تصبري كتير ,هلأ تحت أكتبي مقاساتك ,هلأ بنيجي للألوان عشان تحطي شوية ملاحظات يلي هية عبارة عن نقاط ضعف كل وحدة فينا ,يعني مثلا بحب الحلويات كتير أكتبي لا للحلويات ولونيها وخليها بخط كبير ,أو مثلا بتوكلي شبس كتير أو بتحبي الكيك كتير أو عندك مشكلة بتصحي ينص الليل عشان توكلي حطي كل الأشياء يلي بتعمليها ولونيها بالخط العريض وعلقيها على التلاجة عشان كل ما تضعفي وتستسلمي تشوفي الورقة ,سدقيني راح تكون حافز قوي جدا ومشجع وعن تجربة,وطبعا أخر شي حطي تاريخ اليوم وياريت كمان تحددي المهلة يلي بدك تردي توخدي مقاساتك فيها مرة تانية.

هلأ نيجي للخطوة التالتة لازم يكون عندك دفتر مزكرات ,هاد بدك تكتبي في كل يوم برنامجك اليومي يعني لازم تلتزمي فيه وما تخلي بالبرنامج غير لوكان ظرفك قاهر,مثلا بتكبي لازم أصحى الساعة 6 الصبح وباخد فطوري 6,15 والساعة 7,30 لازم ألعب تمارين رياضة مدة نصف ساعة ,الغدا لازم تحددي أي ساعة ويكون جاهز بميعاده و أهم شي تحددي موعد العشى ولازم يكون أخر وجبة بتوكليها قبل 3 ساعات ما تنامي ,أنا ما بحب إنك تنامي بدون عشى لكن حاولي إنك توخديها بدري .

هلأشوية ملاحظات مهمة جدا ممكن تساعدك :

1-وجبة الفطور من أهم أهم الوجبات يلي بتساعدك على النحافة ,الفطور بحد ذاته يعمل على تنشيط الميتابوليزم (سرعة الحرق للسعرات الحرارية)يعني ما في مشكلة لو كانت وجبة الفطور مشبعة ,بالعكس يعتبر مفيد للجسم .

2-
بالنسبة إلي عمري ما مشيت على ريجيم وأنا ضده تماما ,ممكن إنك تتحكمي بكمية الدهن بأكلك, مثلا إستبدلي الحليب واللبن الكامل الدسم بالخالي الدسم ,لا تستخدمي زيت القلي إلا بكميات تكاد تكون قليلة جدا ,يعني بدل القلي إعتمدي على الشوي والتحمير في الفرن,وعند طبخ الدجاج قومي بنزع الجلد دائما .ويا حبذا لو إنك توكلي صدر الدجاج بدل الفخذ لإنه يحتوي على كميات كبيرة جدا من الدهن ,وأنا شخصيا هيك بعمل تماما وباكل على راحتي بس كمان مش بكمية كبيرة لا تنسو هالشي ,يعني عودوحالكم إنكم توكلو كميات قليلة بس خدو أكتر من وجبة .

3-
حابة أحكيلكم عن اللبن والحليب الخالي الدسم ,أنا بعتبره معجزة في التنحيف يعني لا تتخيلو قديش ممكن يساعدكم ,وخاصة بعد أداء تمارين الرياضة ,يعني لو قمتو بعمل تمارين الوزن والأثقال ,بعد ما تنتهو من هاي التمارين مباشرة أثبتت الدراسات العلمية إنو شرب كأسين من الحليب الخالي الدسم يساعد على بناء العضلات وحرق الدهون وكذلك قبل النوم خذي كأس من اللبن خالي الدسم ,بسبب وجود خمائر وبكتيريا طبيعية ,وأيضا تساعد جدا في حرق الدهون.

4-
يا ريت عند البدء بممارسة الرياضة إنو نقسم الوقت جيدا ,يعني لازم تعملي الأحماء ولإستطالة لتجنب الشد والإصابة في العضلات وخاصة للمبتدئين,وأيضا عند الإنتهاء من التمارين يجب مرة أخرى عمل تمارين الإستطالة لأنها مهمة لإعادة العضلات لوضعها الطبيعي قبل ممارسة الرياضة عدا إنها تساعد في تجنب الترهلات الناتجة عن فقدان الوزن.

5-
كمان شغلة كتير مهمة ,عند ممارسة الرياضة لا تلعبو لدرجة إنك تحسي إنك فقدتي القدرة عل التنفس ,لازم طول ما إنتي بتلعبي يضل تنفسك لا هو بطيئ ولا هو سريع جدا جدا لأنه في حالة كان سريع لدرجة إنك ما بتقدري تلقطي نفسك في هاي الحالة كل تمرينك بكون غلط وعلى الفاضي يعني ما بتكوني تحرقي دهن وإنما بتحرقي في العضل وهاد احد أهم الأسباب يلي بخلي كتير ناس يسير عندهم ترهل وبرجع بزيد وزنهم أكتر من قبل ما يبلشو يعملو ريجيم ورياضة لأنهم في الأساس كانو بحرقو عضل والدهون بتضلها مكانها .



6-
يا ريت تشربو كتير مي ,ولا تنسو المي أبدا ,لانها كمان محفز ومساعد على التنحيف يعني بدي أحكي إنو الناس بتفكر إنو المي بحد ذاتها منحفة هاد الكلام تقريبا غير صحيح ,الموضوعع وما فيه إنو جسمنا بدون المي ما بقدر يقوم بعملية حرق سريعة للسعرات الحرارية ,يعني لو نقصت المي عن الجسم ساعتها راح تقل عملية الميتابوليزم ,وبدي أحكي للناس يلي عندهم زيادة في كمية الماء في الجسم إنو أحسن طريقة للتخلص من الماء في الجسم هي شرب االكثير والكثير من الماء .

7-
حابة أحكيلكم شوية عن المكسرات مثل اللوز والجوز (عين الجمل)يا جماعة لا تتخيلو قديش هاي المكسرات بتساعدكم على النحافة وطبعا هاي دراسة أكيدة ومو من عندي,لكن طبعا المكسرات النية الغير مشوية أو مقلية ,تعتبر دهون هذه المكسرات دهون حارقة للدهون ,ولكن يجب أكلها بإعتدال كل يوم ويا حبذا لو كانت قبل الوجبة الرئيسية بساعة لإنها بتساعد على شعور أقل بالجوع وممكن توكلي كمية أقل من الطعام ,طبعا الكمية المتعدلة عبارة عن قبضة إيد كل واحد فينا ولازم إيدك تكون مسكرة تماما وتعتبر هاي هية الكمية المناسبة لجسم كل شخص.


صراحة في كتير أشياء بعرفها بس هلأ مو متزكرة كل شي بس لما أتزكر كمان شغلات راح أرد أكتبها
أنا حابة أبلش اليوم برنامجي ,بس أنا حكيت ممكن لو كان حدا يشاركني بكون مشجع أكتر ,بدي منكم يلي حابة تبلش ترد ,بس يلي بدو يبلش لازم يدخل هون كل يوم ويكتب شو عمل قديش لعب رياضة وشو وقديش وزنها وأخر الأسبوع كم نزلت ,ساعتها يكون محفز للكل ,يا ريت نساعد بعضنا في الموضوع .