[align=right]

(( الحـــــلقـــــة الســــــــــابــــــعة ..))
"داوي جروح الليل واهدي الحزن بسمه..لا تجرحين الصبح تخفي الحسن عنا..مدي جسور الهمس قولي احبك حيل...لاجل امحي احزاني واحيا بزمن ثاني....حيث الزمن غيرك فيه الفرح مهجور"
خذت نفس طويل طالعني و طالعته بس طنشته و سرت صوب المطبخ حطيت جيس العيش و سرت صوب حجرتي ...غريبه كنت متلهفه اجوف عمور عشان اجاتل معاه بس يوم جفته صابني برووووود بدلت ملابسي و صليت الظهر و رديت المطبخ ..حطيت لي غدا..لمحت عمور بعده يجوف التلفون ولا سال و لا نشد لانه حيوان ...يلست اكل و انا فيني غصه..دش عليه المطبخ..
عمور: ليش ما تعزميني ع الغدااا
رفعت راسي اطالعه و رجعت اكمل اكلي مطنشتننه..
يلس ع الكرسي مجابلني..
عمور: شو فيج وارمه ..؟؟
نوره..........................."اكل ابسرعه و بعصبيه"
عمور: زين عن اتغصين شوي شوي..
طنشته حسيت بطني بنفجر من الاكل كنت ابا اخلص كل الي فـ الصحن بس ما رمت..عشان عمور ما ياكل معاي قمت و شليت الصحن و عقيت باجي العيش فـ الزباله و عمور يراقبني ..
عمور: حرام نعمة الله ..
طنشته فتحت الثلاجه و شربت ماي.. و ظهرت من المطبخ ..لحقني ..مدري مدري شو اسوي فيه يستهبل علي و انا ابا اجتله..يلست ع الكنبه ..قعد حذالي
سمعته يقول لي: اول مره اكتشف انج زطيييييه و جاسيه حتى العيش ما تبين اكل معاج ..
رديت عليه:و انا اول مره اكتشف انك حيوان و لوتي ..
رد علي ابرود: صرت لوتي بالاول بس حميد الحينه انا بعد..
استفزني بروده : ما يخصك فـ حميد..خلك بـ نهله يا بو نهله..
ابتسم: شو بلاها نهله ..هاااااااااا الحينه انتي زعلانه لانج جفتيني البارحه اسولف مع نهله بنت خالوه عايشه..
رديت عليه : لا وااااااااااااالله..
عمور: عيل انا ما منعتج من انج اتسولفين مع عيال خالاتي ..حتى البارحه خليتج ترقدين مع خوله..
جاوبته: انا غيييييير و انت غيييييييير
عمور: شو الفرق
صرخت عليه: عموووووووور لا تستهبل علي تفهم ولا لاء ..
عمور: لا تصرخين..شو فيج داشه علي امبرطمه..
نوره: يعني ما تدري ..
عمور: لا ما ادري يالله قولي شو بلاج..
نوره:انا سمعت كل كلمه انقالت بينك و بين نهله..
طالعني متفاجا معناتها ما يدري اني كنت اسمعهم عشان جي كل ها البرود..
شويه و بصيح: قصيييييييت عللللي ..انت و هالحي....
قاطعني محرج: لا تغلطين عليها هاي الي ترمسين عنها بنت خالتج حالها حال خوله..
رديت عليه: اتهبي الا هي حالها حال خوله خوله ملاك مب شرات هاي الزباله..
فاجاني رده القوي: انا ما اسمح لج تغلطين عليها كونها بنت خالتي و بعد بتكون زوجتي و شريكتي حياتي..
اتخبلت يوم سمعت جملته الاخيره قمت من مكاني و يلست افره بالوسايد مالت الكنبه و انا اصرخ و اقوله..
:- ع جثتي تزوج نهلوووووو
نش عمور من مكانه و زخني: اثجلي شو انتي خبله ..
صرخت عليه و كنت اصيح بصوت عالي: هييييييي تخبلت انا مدري أي كرامه عندك تقبل تزوج وحده وحده
صرخ علي: جب جب اقولج
صرخت عليه:شو ما ترضى عليها
حسيت ان اصواتنا علت و عادي كل الي في البنايه سمعوا صريخنا ...
رد علي: هي ما ارضى و غيااض فيج انا بخطبها الاسبوع الياي ..
رديت عليه بكل عصبيه: انجلع اخطبها بس انسى عندك اختك من بعد ما تخطب هاي الحثاله..
حسيت ان عمور ماسك اعصابه ..كان يبا يمد ايده علي بس شي منعه..اتجدمت منه
و من كل خاطري قلته: اكرررررررهك و اكرررها و بحياتي ما حسيت ان اكره مخلوق كثرها و خاصه البارحه و بسوي المستحيل عشان افرق من بينكم ...
وسرت حجرتي لاني احس خلاص اعصابي تعبت ..و ما عاد فيني اتحمل اكثر بس عمور لحقني الظاهر مب ناوي يعدي السالفه ع خير ..اما انا بعدني كنت اصيح من الغيض ..
وقف عداال باب حجرتي : ليش تكرهينها هالكثر...
ما رديت عليه ...................
كمل كلامه: نهله مالها ذنب بالي صار من زماااااااان
طالعته: ما تلاحظ في شي غريب..كل الي سواه فارس زمااااان و كلنا قاطعنااه الا انت ..و حتى بعد الي صار تبا تخطب نهله و ترتبط فيها و تاخذها معاك الخارج بذمتك ها مب لغز وشي غريب..؟؟
تغيرت ملامح عمور اتجدم مني : ما تبيني اتزوج نهله ...؟؟
هزيت راسي بمعنى لا ما ابا
سمعته يقولي: تبيني اتزوج خوله..
رديت عليه: خوله او غيرها المهم نهله لا ...
يلس حذالي: زين انا بخطب خوله لان هالشي يريحج ..
طالعته مستغربه بس بداخلي طايره من الوناسه بس فاجاني
يوم قالي: بس بشرط..
طالعته من غير ما اعلق ..
سمعته يقول: جان تبين من باجر بخطب خوله و بتزوجها بس شرط انج تزوجين فــــــــارس
صرخت عليه: انت شـــــو اتقـــــول
رد علي: شوه مب عايبنج شرطي..
وقفت: طبعا لا و مستحيل ..اسوي الي اتقوله..
عمور: عيل ليش تبيني تزوجيني وحده ما اباها..
رديت عليه ابسرعه: مشاعري صوب فارس غير عن مشاعرك صوب خوله..
عمور: بس انا ما ابا خوله ..
حسيت باليأس فصحت: تزوج الي تبا تزوجها..نهله ولا خوله ولا غيرهن بس ما يخصك فيني من اليوم انت مستحيل اتكون اخوي انت عدوي..
وقف و اتجدم مني: جفتي نفس المشاعر الي تحسين فيها الحينه انا حسيت فيها يوم قلتي لي انج ما تبيني اتزوج نهله ..
و طلع من حجرتي و تمت كلماته متعلق في بالي مرات عمور يستوي غامض يقول كلام مب مفهوم ..بس خلاص يسوي اللي يباه بس انا ما بخليه فـ حاله و بحاول اسوي الي علي..و من اليوم بطنش عمور و ما بعبر عن راااييي فيه او في نهله يولون المهم بتجرب من حميدااااااان هذا هو المهم و الاهم ...سرت غسلت ملابسي و ع الساعه 5 العصر رن موبايلي و كانت نفسيتي احسن بوايد المتصله خوله..
رديت عليها: هلا بالطش و الرش
خوله: السلام عليج..
نوره: عليج السلام و رحمة الله و بركاته شحالج..
خوله: طيبه انتي شخبارج..
من الخاطر: ززززززززفت
خوله: انتي دوم جي عفانا الله المهم شو رايج امر عليج و اتعشى وياج..
نوره: اتردين الجميل..
خوله: لازم يكون سبب ويا ويهج..
نوره: زين حياج منو بييبج..
خوله: بخلي خليفه يوصلني انا مخبرتنه
نوره: اوكى خلاص شو تبين اسوي لج ..
خوله:هههههههههههه احلى هناك اونج شو تبين اسوي لج اصلا انتي تعرفين تطبخين..
نوره: ابصراحه لا
خوله: عيل لمي ثمج انا مسويه محشي ملـفوف و ايس كريم..
نوره: يا سلام ..زين يالله تعالي بتريااج..
خوله: اوكى ربع ساعه و اكون عندج ..مع السلامه...
نوره: مع السلامه..
فديتج خوله انتي الي اتحسين فيني...زيارتج يت بوقتها محتاجه لـ حد يقعد و يسولف معاي ....اتصلت لـ مخبز ربيع لبنان و طلبت فطاير..بعد مب حلوه ما اضيفها بشيء ..نشيت اكمل غسيل ثيابي قبل ما توصل خوله.. دشيت حجرتي عشان اتسبح و اتعدل بعد ما خلصت لمحت جيس اليشمك لحظه انا ما جربته عليه بس طلبت رقم المقاس..خطر ع بالي اجربه لبسته..
سرت صوب الجامه اتفاجأت ابصراحه شكل الثوب رهيب عيل ..لالالا انا فديتني غاويه شو بلاني..عيبني شكلي و الحمدلله ما ندمت اني اخترت هالثوب حطيت جحل و كلوس و طلع شكلي اوكى ابتسمت لـ نفسي راضيه كنت ببدل بس رن جرس الباب هذي خوله وصلت مسرعهااا ..
.بفاجاها فـ الثوب الي لابستنه لبست الشيله الخاصه بالثوب و كان لونها ازرق..وظهرت من حجرتي ..اندق جرس الباب مره ثانيه..
رديت : زيــــــــــــــن اذيتينـــــــا
فتحت الباب و انا اعرض نفسي:شو رايج بـ ثوبي مفاجاه..
وقفت وقلت: صح..
صح كانت مفاجاه لان الواقف عند باب الشقه فـارس مب خوله..وقفت ابمكاني مشلوله
ابتسم لي: يهبل عليج احلى ما رات عيني
كلماته كانت مثل الصفعه قومتني من الصدمه...حرجت كنت بصكر الباب ابويهه ابتسامه نظراته الشيطانيه هي هي نفسها ما تغيرت ..
اتجدمت و مسكت باب الشقه :- انت شو تبا منــــــــا ..
فارس: و ليش محرجه..
نوره: لاني ما احب اجوفك حذال باب شقتي لانك اتييب الشبهه
رفع حياته: بس مب ياينج انا ياي ادور ع عمور..
صرخت عليه: ما يخصك ابعمور اطلع من حياتنا كافي الي يانا منك
وصكرت الباب ابويهه ناقصتنك انا بعد كافي الضرابه الي صارت بيني و بين عمور اليوم ابسببك و ابسبب نهله ...الله ياخذكم و افتك منكم ...دشيت حجرتي بعصبيه و بدلت ثوبي....اتذكرت يوم قالي يهبل عليج..فسخته و فريته بعصبيه ع الشبريه ما بلبسه يوم الملجه بس لان فارس جافني لابستنه ...لبست بيجامه لونها بنفسجي ما اقدر اوصف لكم شعوري و انا اجوف فارس جدامي لا و بعد قاعده استعرض عليه...الله يخس ابليسج خوله كل منج...توني اتذكر الكلام الي دار بينا..مدري من وين يتني العصبيه و الوقاحه..بس امثال فارس يستاهلون و ينعطون بالويه دواه عشان يحرم ايي شقتنا صج ما عنده دم ..بعد كل الكلام الي سمعه الاسبوع الي طاف بعد له ويه ايدق باب شقتنا...سمعت الجرس مره ثانيه..خفت لا يكون بعد فارس..اتصلت بخوله..
نوره: انتي عند الباب
خوله: هيه فتحي
سالتها: خليفه وياج ولا ابروحج لاني لابسه بيجامه
خوله: لا ابروحي ذليتيني ترااا
نوره: اوكي يايتنج باي..
سرت صوب باب الشقه و فتحت الباب ..
يريتها: دشي ابسرعه..
خوله مستغربه: شفيج ..؟؟
يلستها: خليفه نزل معاج..
خوله: هي وصلني عند اللفت ليش شو مستوي شو فيج متغيره..
سالتها: ما جفتوا فارس عند البنايه..
خوله: فارس !!! لا شو يسوي
حسيت بالراحه و عقبها صحت غطيت ايدي بويهي و يلست اصيح
خوله: شو فييييج
يلست احكي السالفه لـ خوله..
خوله: مدري عمور شو سالفته ويا فارس نحن اهله ما نذكره موليه..
نوره: ما قصرت فيه سبيته و جلعته من هني
خوله: هههههههههه ما يحتاي حد يعلمج..
نوره:هاليومين وايد مشاكل صارت لي
خوله: شو
نوره: ساعديني انسى لا تساليني
خوله: ان شـــــــــــــــــــــــا ء الله
خذت عنها المحشي و الايس كريم و حطيتهم فـ المطبخ ..سرت الصاله جفتها يالسه اتجلب قنوات التلفزيون ..
كنت ابا اقولها شو سمعت و جفت البارحه في بيت خالوه عايشه بين نهله و عمور بس غيرت رايي لان يمكن بعد عمور يخطب خوله و اكيد بترفض اذا عرفت علاقة عمور بـ نهله ..
فاجاتني: شو فيج سرحانه تراج مب طبيعية ..
يلست حذالها: خولوووه ابا اطلب منج طلب ..؟؟
خوله: انتي تامرين..
نوره: جربيني من حميد..
خوله: ليش ..؟؟ عشان اتقصين عليه اسفه ...انا اصلا مب مقتنعه بالي اتسوينه ..
نوره: المهم انا اقتنع.و بعدين حميد يحبني
خوله: وايد واثقه انتي نسيتي انه لوتي..
نوره: بس انا غير..
خوله: حبيبتي نوره تهدمين حياتج عشان بس عمور خليه اذا يبا نهله انتي ليش اتكونين حاجز من بينهم..؟؟
نوره: عمور ما يحب نهله بس يبا يخطبها علشان يغايضني..
خوله: انا اول مره اسمع الزواج بس عشان غيااااااض
نوره: المهم انتي بتساعديني ولا لاء..
خوله: طبعا لا ..ما يخصني فيج حرام فكري بـ حميد يوم بتقوليله خلاص ما اباك..
نوره: ما بقوله..
خوله: اعرفج انا نوره ...سوري خليني ابعيد عن الخط..
نوره: زين ابرايج..زين شو استعداداتج للملجه ما بقى غير 4 ايااام
مب مهتمه: عادي.ليش انا العروس عشان استعد و ما استعد ..
رديت عليها: اونج انتي ..مستويه بارده..أي صالون بتتعدلين..
خوله: محتاره بين ايفاري و اتش تو اووه ...المهم أي صالون اتروحين له بروح معاج..
نوره: اسمعي اذا نهله بتلحقج ما باخذج معاي ..
خوله: نوره مب لها الدرجه ..نهله بشو ضرتج..
نوره: كيفي ما ادانيهاا..اقولج من الحينه اذا فكرت نهله اتيي معانا ما باخذها..
خوله: زين زين مستويه فضيعه انتـي ..
ما تنلامين خوله ما اتعرفين شو الي صار و شو الي استوا عشان جي لازم بدافعين عن نهله و بتعتبرينها مالها ذنب..علها السقم ....
خوله: تدرين نوره يوم السبت اجازة راس السنة و اتفجوا يروحون البر رحله ...يعوضون عن الرحله الي اجلناها هذاك اليوم..
نوره: هيه بس ما بسير معاكم...؟؟
خوله: ليش !!
نوره: بس مالي نفس...
خوله: عشان نهله ..
نوره: اتزول..
خوله: خلاص اذا ما بتروحين انا بعد ما بروح ...
نوره: قومي قومي خلنا نصلي المغرب و بعدين نتعشى..
خوله: يالله بالستر ...حشى فطور هاه مب عشى
نوره: هههههههههههه
نشيينـا ..انصلي المغرب ..و بعدين حطينا العشى و بالنفس الوقت يااه راعي المخبز و معاه الفطاير ..تعشينا ..سولفنا و ضحكنا..حمدت ربي ان خوله يت اتزورني اليوم لانها غيرت نفسيتي 180 درجة رن موبايلي ..طلعت من المطبخ و سرت صوبه جفت حميد المتصل عقدت حياتي ..شو مشكلته هاه ...رديت المطبخ ...
خوله:منوه ...؟؟
نوره: بتصدقيني اذا قلتلج حميد ..
خوله مصدومه: حميــــد ولد خالوه عايشه..
هزيت راسي بمعنى نعم و كلت حبة محشي...
خوله: نوره .....
قاطعتها: لا اتكملين كلامج..حميد من البارحه يدق لي بس انا ما رديت عليه...ما ابا اقوي علاقتي فيه عن طريق التلفون لان ها مب من طبعي ولا من اخلاقي لاني اعرف رمسة التلفون تطور و تطور..بس انتي ليش مستغربه ..انا ع بالي خذ رقمي منج ..
خوله: لو طلبه مني ما كنت بعطيه ..بس الظاهر ماخذنه من خلود او نهله..
نوره: السم الهاري
خوله:ههههههههههههه بسج دعاوي اعوذ بالله منج...
خلصنا اكل و ع الساعه 8 اتصل خليفه عشان يمر ع خوله ... و قبل ما تظهر من البيت
مسكت ايدها:- مشكوره خوله ..
خوله: ع ..؟؟
نوره: ع الزياره ابصراحه نفسيتي تحسنت وايد..
ابتسم لي و باستني ع خدي: يالله فيمان الله تعالي لنا باجر..
رديت عليها: اكيد ..فيمان الله ..
سرت المطبخ و نظفته.. بعدين لبست زلاغي احب ارقد بالزلاغ خلاص تعودنـاا و لبست كوت عمور الاخضر و انسدحت ع الشبريه..رقدت ابسرعه يمكن كنت تعبانه ..
بعد ساعتين نشيت و انا ارتجف .. و كنت احس ان ويهي معرق..كنت اجوف فـارس في منامي..جفت نظراته الشيطانيه اتلاحقني من مكـان لـ مكان و كانه يهددني...حطيت ايدي ع قلبي الي كان يرقع..سرت المطبخ و شربت كلاسين ماي..حاولت اهدي نفسي..حسبي الله عليك يا فارس قمت اتزورني فـ المنام..رجعت لـ شبريتي احاول ارقد تجلبت و تجلبت .
.موقف يوم استعرض بـ ثوبي لـ فارس و انا الي ع بالي خوله..دوم فـ بالي ...شسوي ..يالله ...فتحت السده الجريبه من شبريتي و طلعت رواية اقراها..اشغل نفسي.. ويلست اقرا لي ما رقدت من غير ما احس ابعمري ...نشيت ع صوت اذان الفير ..صليت و قريت قران كالعاده... و لبست ..عشان اروح الدوام..كنت احس بصدااع خفيف يمكن لاني مب راقده زين..
.و انا ظاهره فكرت امر حجرة عمور اجوفه يااه ولا بعده سهران برع..فتحت باب حجرته جفته رااااقـد..جفت موبايله ع الطاوله ياني فضول اجوف امخزن رقم نهله او لا تجدمت شويه شويه..شلت الموبايل عشان اجيك بس للاسف امسوي قفل ...الهرم..حطيت موبايله ..ورحت دوامي...اتفاجات اليوم بالدوام ان خوله يايه عشان التدريب لانها خريجه هالكورس..اختارت مستشفى الي انا اشتغل فيها عشان اتكون جريبه مني...كان اليوم بيشيكون ع المكان و بعد عطلة الربيع بتبدأ تدريباتها ..
.و بعد اليوم وصلني مسج من حميد يسالني ليش ما ارد عليه .." بعد طنشته و ما رديت عليه..خليني العوزه...شويه..كنت امفكره اروح بيت خالوه مريم عشان اجوف حميد..بس يوم قريت المسج و جفته يعاتب..غيرت رايي و قلت بروح لهم بعد يومين يعني يوم الاربعاء ..حجه ابارك لـ خليفه بيوم ملجته ...و اخلي حميد يتعلق فيني اكثر و اكثر ...
و في يوم ملجة خليفه ع شيما بنت عمه عبدالله...سرت بيت قوم خالوه مريم وقت العصر...دشيت ما لقيت حد سالت الشغاله عن خوله قالت لي طلعت مع خالوه مريم و خالي احمد عشان يشترون اغراض لـ باجر الخميس حفلة الملجه ...
و انا طالعه من البيت جفت خليفه داش ...
خليفه: هلا و الله..
ابتسمت له: مبروووووك ..
رد عليه و كان باين عليه مستانس: الله يبـارك فيج عقبالج..
نوره: تو الناس لا تتفاول علينا...
خليفه: هههههههههه انتن يا البنات حركات اونكن ما تبون اتعرسات و مناك ما اتصدقن خبر يوم تنخطبون...
نوره: أيـــــــه ارمس عن حرمتك مب عنااا
خليفه: ايه انتي لا تغلطين ع الاهل..
ضحكت من الخاطر: هههههههههههههههه و الله وصارت عندك حرمه ..
خليفه: احم احم ...
نوره: شو شعورك..
خليفه:بطير من الوناسه و الله يا نوره شعور جميل..
ابتسمت له: الله يهنيك..
خليفه: هي حلوه صح..
نوره: قمر ما شاء الله عليها بس انت تباها عشان حلوه..
خليفه: لا بس بعد الواحد لازم ياخذ له وحده تفتح نفسه..بس قصيره
نوره: من طولك زين تناسبك...بس احلى خواتها ...
خليفه: تدرين يوم دشت حجرة القاضي عشان اتوقع الكتاب...جفت وحده متغشيه قزومه و يابسه انا ع بالي وحده بصف سادس
نوره:ههههههههههههههههههه
خليفه: و الله استغربت ما توقعتها جـي ..
نوره: زين ع ما وصفتها بس بعد تناسبك ولا تبا وحده اطول عنك يا الدجمه..
خليفه: طوفي طوفي لا اييج طرااااااق
نوره: اترووووووووم لا اتخليني اتضارب وياك اخليك ادش باجر الملجه و انت متكسر ..
خليفه:هههههههههه اتسوينها يا الدبه..
نوره: احسن من اكون يااااااااااااابسه
خليفه: نغزات هاه ..
نوره: اسولف حرام عليك اتخليني اطيح فـ البنيه ابسببك..يالله انا بروح بيتكم فاضي ..
خليفه: تمي زين للعشى..
نوره: ما اروم بمر ع خالوه عايشه بالمره عن تحشرنا بعد..
خليفه: ترا حميد محد فـ البيت..
طلعت لساني: مالت عليك..
سمعت ضحكته و انا سايره ..الله يسعدك يا خليفه و يهنيك مع بنت عمك شيمـا ..فكرت اني ما اسير بيت خالوه عايشه بس عشان ما اجوف ها الخياس نهله..اتولي وراا باجر الجمعه و اكيد عمور بيي يجوفها..موعدهم يوم الجمعه...الله يفرق بينهم ان شاء الله ..دشيت بيت خالوه عايشه..\
دشيت الصاله جفتها يالسه و معاها حرمتين وحده عرفتها حرمة علي بن محمد ييرانا و الثانيه مدري منوه ...سلمت عليهااا ...اصرت اني اقعد معاهم ..بس انا رفضت بحجة انه جريب ياذن المغرب و انا ما فيني اتاخر ...
سمعتها اتقلي: زين روحي قعدي عند نهله جان تستحين من الحريم..
رديت عليها: لا و الله مب سالفه مستحى انا كنت ماره بيت خالوه مريم ابارك لهم ...بس ما جفت حد فـ البيت فقلت اسلم عليج بالمره ..
خالوه عايشه: الله يسلمج يا يمه ...
نوره: زين اسمحولي انا رايحه ..
سلمت عليهن و طلعت من بيت خالوه عايشه.. و قبل ما اوصل سيارتي لمحت سياره حميد جريبه مني..
حميد: شحالج نوره..
كملت طريجي: الحمدلله..
حميد: قاعد ارمسج زين اصبري
رديت عليه و انا اكمل طريجي: مب حلوه ارمسك فـ الشارع ..
حميد: زين تعالي دشي بيتنا ابا اقولج شي ..
بس انا وصلت سيارتي و كنت اقول فـ نفسي اثجلي نوره اثجلي حميد ما يباله غير التطنيش عشان يصير خاتم في صبعج ..فتحت باب سيارتي ...شغلت السياره بس حميد الهرم صكر علي الطريج و نزل من سيارته و فتح باب سيارتي..و قعد حذالي
شهقت: انزل من سيارتي...
مستغرب:شو فيها ..؟؟
كررت جملته: شو فيها!! ...لو حد جافنا شو بيقولون ..؟؟
هز جتفه مب مهتم: قلتلج دشي بيتنا برمسج ما رضيتي ...
طالعت ساعتي اوني مستعيله: حميداااااااااااان بتاخر شو بغيت..
حميد: اسوي لج من يوم الجمعه ليش ما اتردين علي زعلانه مني ..؟؟
نوره: لا مب زعلانه
حميد: عيل ليش امسويه لي طااااااااف
ابتسمت له: و ليش ارد عليك باي صفه..
حميد:بصفتي ولد خالتج..
نوره: ولد خالتي ع عيني و راسي بس مب معناتها ارمس واسولف معاك فـ التلفون..
حميد: كنت بسالج ليش هذاك اليوم طلعتي من بيتنا محرجه ..بس انتي ما رديتي علي فقلت بتصل بج اجوفج ليش زعلانه مني..
قلته: حميد انت سويت شي يزعلني
رد علي: لا و مستحيل ازعلج
نوره: عيل خلاص ما كان في داعي انك تتصل ولا ماخذنها حجه..
حميد: تبين الصراحه
هزيت راسي بمعنى هي
حميد: انا ابــــــــــا اخ........
قاطعنا خليفه ظاهر من البيت: اوب اوووووب اوووووووب احلى هنااك
طالعت حميد: جفت شسويت..شو يسكته خليفه
خليفه: هاه شو اتسون..قلبي كان حاس من زمااااان
حميد: ماشي اصلح سيارتها اختربت..
نوره:ههههههههه حميد انزل بروح البيت..
خليفه: حراااااااام لا تجرحين شخص هام في حبكم و انجبر
حميد: محد فاهمني غيرك خلوف
حذرته: حميدااااااااااان انزل من سيارتي
خليفه: انزل لا اتصرخ و اتلم عليك الناس و تفضحنـا
حميد:ههههههههههههه خلاص استسلم الايام يايه نوره ..
خليفه: ها ع شو ناوييييييين
حميد يطالعني و يرد ع خليفه: انت ما يخصك
اترييت حميد لـ ما يحرك ابسيارته..ضربت لهم هرن و روحت عنهم ..اخ كان بيقولي ابا اخطبج بس خليفه الثور خرب علينا متفيج...خلووف يظهر علينا بها الوقت اووووووف قهر..متى الحينه بتجاوف مره ثانيه..هي صح اجازة راس السنة..هههههههههه ضحكت من خاطري احس بوناسه تدرون ليش لاني جني قاعده اغامر ..و يا انا يـــــاا عمـــــور ..انا اراويك عمور ..اتحب نهله هااااااااااااه ..
في اليوم الثاني شليت ثوبي و اكسسواراتي..و فريتها في السيت الي ورا من سيارتي و روحت بيت خالوه مريم...فكرت اروح اتغدا هناك و بالمره نطلع الصالون انا و خوله..الي حجزت عند ايفاري و نهله و خلود ..قالوا وحده بتعدلهن يعني بتمر عليهن البيت..فكه ..زين يت منهن ...دشيت بيت خالوه مريم...البيت صخه..ولا جنه اليوم بتكون عندهم ملجه...دشيت الصاله جفت خالوه مريم ترمس بالتلفون صكرت يوم جافتني داشه...
سلميت عليها: السلام عليج خالوه..
ردت علي: عليكم السلام..
نوره: شو البيت هدوء ولا جنه عندكم ملجه...انا بس المتحمسه
خالوه مريم:هههههههههه الحفله فـ بيت العروس مي هنا حق شو الحشره...
نوره:الا وين خوله..
خالوه مريم: بعدها راقده حتى المعرس رااااااااقد..
دش علينا خالي احمد: السلام عليكم..
نوره: مريم= عليكم السلام..
نوره: اشحالك خالي..
خالي احمد: الحمدلله ابخير ربي يسلمج ما شاء الله امبجره اليوم..
ابتسمت له: شسوي مرتبشه عندي ملجه ..
خالي احمد: ههههههههه عمور شخباره..
امممممممم شو ارد عليه من يوم تضاربت معاه ما اجوفه فـ الشقه ..
جذبت عليه: الحمدلله ابخير
خالي احمد: خبريه ايي التدريب ما بقى شي ع سباق التجديف الا ثلاث شهور..
نوره: ان شاء الله
خالي احمد: ولا اقولج عطيني رقمه انا ابروحي بتصل به..
احسسسسن وفرت علي شوط كبير يا خالي عطيته الرقم ..
مريم: لا اتخلي ولدي ايجدف تراه معرس..
احمد: ماشي معرس ولا غيره حاله حال الشباب
مريم: فديت ولديه ياينه عرس تبا اتهد حيله..
احمد: دوااهم محد قالهم ما ايون يتدربون محد فيهم غير حميد ..ولا عمور و خليفه فساااد
نوره: و محمد ولد خالوه عايشه..
خالي احمد: لالا هاه ما يكون فاضي دوامه برع راس الخيمه فـ دبي عشان جي ما يناسب يشترك ويانا اصلا ابروحه ما يبا...
مريم: و الله مدري ع شو متعبي رواحكم
خالي احمد: تراثنا هاه واجب انحافظ عليه..
و ابوي بدت ضرابه خالي احمد و خالوه مريم نشيت من مكاني: بروح اوعي خوله
مريم: تعالي تريقي
نوره: بسني الحمدلله كلت في البيت...
دشيت حجرة خوله و كانت راقده يريت عنها اللحـاف:قومي بسج رقااد
خوله اتيير اللحاف: اووووه خليني راقده متاخر..
نوره: يالله قومـي اففففففففففففف و الله بجب عليج ماي بارد
يلست خوله طفرانه: انتي شو يايبنج من صباح الله خير
نوره:ههههههههههه اليوم الخميس ماشي دوام شي ملجه قلت بيي بجوفكم مرتبشات
خوله ردت ترقد: متفيجه انتي ..
نوره: زولي بروح بيت خالوه عايشه احسن لي بس بردلج اذا جفتج مب ناشه بسبحج بالماي
اتشر لي:برع برع
ضربتها ع جتوفها: زين بتجوفين
قمت عنهاا و خذت مفتاح الحجره معاي عشان ما تقفل حجرتها اتسويها الدبه....جافتني خالوه مريم ظاهره من حجرة خوله
نوره:بنتج الدبه ما تبا اتنش
خالوه مريم: تتحرينها شراتج نشيطه هاي موتها و الرقاد..
نوره: ويه وين اختفى خالي احمد..
خالوه مريم: وين بعد رايح يشيك ع الشاحوف وين بتروحين اجوفج واقفه
نوره: بسير بيت خالوه عايشه بروح العب مع جسوم احسن لي
خالوه مريم: ثواني بييب عبايتي بيي معاج..
دقايق ووصلنا بيت خالوه عايشـه ..جفت خالوه عايشه و خلود و معها جسوم قاعد يصيح ذكرني بولد السوريه المنبه المهم كانات قاعدات تحت الليوان ..خالوه عايشه ما اتودر هالمكان...سلمنا عليهم ...يلست الاعب جسوم ...طبعا الطفس ما يحبني من يجوفني يصيح لها الدرجه انا اخوف !!
شويه و دشوا علينا محمد و حميد.و جسوم من جاف ابوه يلس يصيح فشاله عني
خالوه مريم: توه خالك احمد يطريك..
حميد: ان شاء الله بالخير..
خالوه مريم: هي اكيد قال انت الي فيهم تدرب عشان سباق التجديف ولا عمور و خليفه ولا ينجافون الا يوم السباق
حميد: عيزت من ازقرهم ...شحالج نوره..
رديت عليه من غير ما طالعه: بخير ..."كنت ابا اشرد من نظراتهم مدري ليش حسيت كل الانظار صوبي يوم حميد سلم علي فقلت حق خلود" :- خلود راويني فستانج تراني مب جايفتنه..
نشت خلود: تعالي
حمدت ربي سرنا حجرة خلود و طلعت فستانها و كان لونه وردي بصراحه حلو ..
نوره: مب جنه واسع عليج..
خلود: لا بالعكس قياسي مره ..متى بتروحون الصالون..
نوره: بالاول خلي ست الحسن و الدلال اتنش من رقادها ...بس يمكن بعد الغداااو انتوا..؟؟
خلود: بتيينا الصالونه بعد اذان العصر ..
نوره: زين مع انه احس ماله داعي ملجه فـ البيت ..
خلود: صدقج خساير المهم خلينا نستانس..و نتكششخ..
نوره: تعالي نظهر من حجرتج اخاف ريلج ايي
خلود: اوكى انروح حجرة نهله..
قاطعتها: لااااااااااااع نقعد في الصاله
خلود:ههههههههه انتي بعدج ع فكره ما لحظتي شي من دش حميد..
نوره: امبلى حسيت نظراتكم كلها علي اتلومت
خلود: لانه البارحه رمس اهله و قال يبا يخطبج..
حسيت ببروده بكل جسمي يمكن من الصدمه مع اني ادري انه يبا يخطبني ...بس انا ما ابا حميد ما اباااااااه بس هذي فرصتي ..
خلود:حووو وين سرحتي
نوره: هذا حميد متفيج قومي خليني نظهر من هني..اخاف محمد يطب علينا
طلعنا و سرنا عند قوم خالوه مريم و عايشه بس يوم جفت حميد و محمد بعدهم يالسين برع ...
غيرت رايي: انـا بروح اجوف خوله..
خالوه عايشه/ ردي تعالي تغدي هني..
خالوه مريم: ويه البنيه يايه بيتنا ..و انتي تبينها تتغدى فـ بيتكم ...؟؟
نوره: ههههههههه اول مره احس اني محبوبه
خالوه مريم: انتي الغاليه بنت الغاليه ..الا اقول عايشه لا تطبخون اليوم امسوين غدا من المطعم حق اهل العروس و جدر عيش لنا بنجسم ع الحاره و بنطرش لكم..
خالوه عايشه : زين قلتلي ...
نوره: خلود ما بتيين معاي..
خلود: برقد جسوم و بيي ...
محمد: و انا !!!
خلود:هههههههههه انت خلاص اسبوع هني مليت منك..
محمد: افـااا
الكل: ههههههههههههه
نوره: زين انا بسير ..فيمان الله..
مدري ليش بغيت اروح بيت خالوه مريم هل لاني عرفت ان حميد برع و يمكن اتلاقى معاه او اني اهرب من خالوه عايشه عن تفتح لي سالفه الخطبه ...زين و الله خليفه ملج و شجع حميد و عمور ...اووه نسيت اسال خلود شو قالت نهله يوم حميد خبرهم انه يبا يخطبني..يولون و انا شو يهمني حتى حميد ما يهمني..طلعت من بيت خالوه عايشه ..جفت حميد قاعد فـ سيارته طنشته.. و سرت بيت خالوه مريم... كنت اعرف انه بيلحقني شعور بداخلي عطني هالاحساس...
حميد: نوره..
صديت صوبه: هـلا و الله
حميد: وايد تتغلين كنتي غير..
طالعته اوني مب فاهمه قصده...
حميد: شحالج..؟؟
رديت عليه: ابخير ..
حميد: خبرت خلود اني قلت لاهلي اباج اتكونين حليلتي
ما عرفت شو ارد ولا شو اقوله ..معقوله صرت وحده تلعب بالمشاعر..و يمكن حميد بعد يلعب علي ..رن موبايله ارتبك ياي احساس انه المتصله بنيه..طالعته بنظرات اتطنز عليه ..حول تلفونه صامت..
حميد: شو رايج...؟؟
نوره: انا بنت خالتك ..و انت ولد خالتي و عندي اخ تطلبني منه...
حميد: يعني انتي موافقه..
ابتسمت له لان فرصتي يت بوقتها: ..بشـرط ...
حميد: انا موافق
نوره: حميدااااااااان انا مب يالسه العب معاك ..عندي شرط ولازم تسمعه..
جفت الحيره بعيونه: شـو امري ..
نوره: اترد عمر اخوي اذا خطب اختك نهله.."و نطقت اسم اخته باشمئزاز"
حميد: مستغرب: عمور يبا يخطب نهله !!!
نوره: هي يفكر يخطبها..اذا تم زواج عمور و نهله مستحيل ارتبط فيك..
حميد بعد مستغرب كنت بضحك ع شكل ويهه: ليش كل هاه ..؟؟عيل ليش نهله استانس و رحبت بقراري يوم قلت بخطبج..
رفعت راسي بكبرياء :انا غير و نهله غير.. و انا لي اسبابي
حميد: بس انا مالي حق ارد أي واحد يتقدم لهاا
رديت عليها: امبلى مب انت اخوها العود و مسؤل عنها ؟؟؟
حميد: بس ليش ما تبين عمور ياخذ نهله..
رديت بعناد: قلتلك لـي اسبــــــــــابي
رده فاجأني: مقدر اوقف نصيب اختي عشاني و عشانج..
انصدمت توقعته انه بيوافق ..يا اللوتي الحينه بينت نواياك تبا اتقص علي شرات ما اتقص ع البنات الي اترمسهن ..كنت بسبه و اضربه بعد بس مسكت اعصابي لاني في بيت خالوه و مب حلوه اسوي هالحركه ...
اتصنعت ابتسامه و انا من داخلي ميته قهر
نوره : خلاص عيل مالنا نصيب

[/align]